Киноны саундтракуудыг сонсч байхад хамгийн таалагдсан нь энэ уран бүтээл байлаа. "My Love by Sia"
Сонирхуулахад Sia Furler нь Австралийн жазз, поп урсгалаар уран бүтээл туурвидаг дуучин бүсгүй юм байна.
Гэхдээ олон нийтийн сүлжээ сайт "Фейсбүк"-ийн ачаар цахим ертөнцийн идэвхитэй хэрэглэгчид, тэдний дундаас "Монголын кино сонирхогчид" бүлгийн зохион байгуулагчдын ачаар 300 гаруй гишүүд өчигдөр буюу, киноны нээлтээс нэг хоногийн өмнө "Хиртэлт"-ийн анхны үзэгчид болсон юм. Энэ бол гайхалтай, зохион байгуулагчдад талархсанаа илэрхийлье.
"Өргөө" кино театрт 20,00 цагаас эхлэх нээлтэнд 19,00 цагаас л олны хөлийн чимээ сонсогдож эхэлсэн. "Харуй бүрий" киноны анхны үзэгч болохоор яарсан, тэсэн ядсан сэтгэлийн хөдлөл зочдод байсан нь лавтай. Биечлэн уулзаж байгаагүй ч, цахим ертөнцөд аль хэдий нь танил болсон олон залуус гар барин мэндэлж, сонирхолтой яриа дэлгэж цагийг өнгөрүүлж байсан юм. Удалгүй "Монголын кино сонирхогчид" бүлгийнхэнд зориулсан нээлтийн ажиллагаа эхлэв. Гишүүд нэрээ шүүлгэж, хөнгөлөлттэй үнээр тасалбараа аван амтат коктейлээр дайлууллаа. Энэ үед "Өргөө" кино театрын менежер Аюур /уучлаарай, нэрийг нь сайн санахгүй байна./ зочдод нэгэн баярт мэдээг дуулгасан нь манай бүлгийн гишүүд хойшид "Өргөө" кино театрт шинээр гарах дэлхийн шилдэг киноны байнгын АНХНЫ ҮЗЭГЧИД байх болно гэсэн гайхалтай санаа байсан юм.
Ингээд зарласан ёсоор "Харуй бүрий" киноны фанатуудын дунд асуулт, хариултын уралдаан явуулж 6 оролцогчдоос киноны тухай мэдлэгээрээ илүүрхсэн нэгэн охин "Харуй бүрий" номын монгол хувилбараар шагнуулсан. Түүнчлэн "Twilight" цувралыг бүрэн эхээр нь болон уг зохиолын тэмдэгтэй дурсгалын аягаа авчирсан бас нэгэн бяцхан охин цуглуулгандаа монгол эхийг нь ч нэмж хийхээр болов.
Цагийн зүү 21,15 болоход үзэгчид танхимд суудлаа эзлэн, 21,30-аас удаан хүлээсэн киногоо үзэх мөч тохиов. "Харуй бүрий"-н эхлэлийг үзэгчид алга ташилтаар угтан, 2 цагийн турш баярлаж, гуньж, тулалдаж, өрөвдөн, хайрлах гээд бүхий л сэтгэл хөдлөлийг амссан нь лавтай.
Жинхэнэ кино сонирхогчид, "Twilight"-ийн фанатуудтай энэ хормыг өнгөрүүлэх гайхалтай байлаа. Цаашид ч энэ төрлийн олон нийтийн арга хэмжээг зохион байгуулахад, гараа өргөөд, гүйгээд очих хүн олон бий гэдэгт итгэлтэй байна.
Харин киноны тухай дэлгэрэнгүйг "Өргөө" кино театрт үзэж, тэр бүх сэтгэл хөдлөлийг өөрийн биеэр мэдрээрэй. Бүр тэсэхгүй бол Ууганаа блогтоо бичсэн байгаа, театр явахын өмнө уншаад үзээрэй.
Хэрвээ тэр УИХ-ын гишүүнээр сонгогдсон бол, Irish-т, The Lemons-ийн тоглолтонд гэхчлэн бидний дунд дуулаад явахаа больдоггүй юм аа гэхэд, ямар ч гэсэн ховордох байсан байх. Тийм болохоор түүний төлөө сонгуульд саналаа өгөөгүй хүмүүст би энэ удаа талархая.
Цаашид дуугаа дуулаад, залуус биднийг олон сайхан зүйлд хөглөн, уриалаарай. УИХ-ын гишүүн болоогүй дээ харамсах хэрэггүй ээ.. Тэртээ, тэргүй хэдэн жилийн дараа монгол метротой болох байх. ;-)
Нуршуу ч гэмээр эсвэл асар олон хүний хөдөлмөр, бүтээллийг баллачихав уу ч гэмээр биччихлээ. Уучлаарай.
Ингээд үндсэн санаандаа оръё. Жэнни охин сургуулийн хамгийн шилдэг нь байсан. Тэр бүх л хичээлд "А" авдаг, гайхалтай сурагч байсан. Гэхдээ тэр гайхалтай том алдаа гаргасан. Яагаад? Сургууль түүнд бүхнийг зааж, тэр бүхнийг сурсан шүү дээ. Гэхдээ юуг үлдээчихэж вэ?
Хүмүүс "Амьдралын их сургууль" гэж ярьдаг. Харин Жэнни түүнд сурч чадаагүй байж. Тэр бодит амьдралаас, нийгмээс ангид амьдарч гэртээ, өрөөндөө франц дууны үгээр амьдралыг төсөөлж байжээ. "Оксфорд"-од сурах зорилгоо ч ухамсарлаагүй байж. Хүн сайхан амьдрахын тулд зорилго тавьж түүнийхээ төлөө аливаа үйлийг хийдэг байх. Харин тэр аавынхаа өөрт нь босгосон зорилгын төлөө амьдралаа үрж байж. Энэ л түүний алдаа. Үүнтэй адил залуусын дунд тэвэртэй багтахгүй номноосоо илүүг харж чадахгүй хүмүүс олширчихжээ. Дунд сургуулиа төгсөөд яагаадыг мэдэхгүй бусдын л адил их сургуульд орно гэж бодох, орсон хойноо яагаад сурж байгаагаа ч мэдэхгүй яваад байдаг хүмүүс олон. Тэгвэл нэг удаа ч болов гудамжинд гараад ирээдүйд яаж амьдрах тухайгаа бодоод үзээсэй. Тэгээд түүний төлөө юу хийвэл зохилтойг тунгаавал дээрсэн. Учир нь үүнийг бидэнд сургууль заадаггүй юм.
Энэ жилийн өвөл яагаад ч юм урьд урьдынхаас удаан болоод байгаа юм шиг санагдаад байх юм. Эсвэл би урьд урьдынхаас илүү урин цагийг хүлээгээд байгаа юм болов уу. Ямар ч гэсэн гадаа дулаарвал, ганцаараа ч хамаагүй сурсан зангаараа элдэвийг бодоод л алхах юмсан. Бас хөнгөн, нимгэн хувцасаа ч өмсмөөр юм шиг.
Энэ өвөл урт болоод байгаагийн учир нь дэлхийн дулаарлаас болж хойд мөсөн далайн мөс нь хайлаад түүний хүйтэн агаар хойноос урагшилж байна гэж хаа нэгтээгээс уншсан санагдаж байна. Үүнд бас л бид буруутай байх даа.. Байгаль эхээ хайрлаж харилцаагүйн улмаас, тэр биднээс нүүр буруулжээ. Уг нь хүн эх дэлхийгээ ийм аймшигтай болгох хүчтэй юм чинь, эргээгээд сэргээх хүч баймаар л юм. Гагцхүү тэр хүч нь ганц, нэг эсвэл хэсэг бүлэг биш дэлхий нийтийн бүх хүмүүсийн хүчин чармайлтын л нэгдэл байна байх. Бүгд дор бүртээ хичээх аваас хүсэл, сэтгэлийн минь нэгдэл байгаль эхийг минь анагааж чаднаа.
Би энэ удаад хэн нэгнийг ингэ, тэг гэж ятгахгүй ээ. Учир нь хүн бүр хогоо хаяхгүй байх... тухай мэдэж байгаа. Харин зүгээр л зүрхнийхээ гүн дэхь далай шиг сэтгэлийнхээ өчүүхнийг байгаль эхэд өгөөчээ л гэх байна. Хэрвээ тийм сэтгэл байх л юм бол аяндаа тэр таныг буруу үйл хийх үед тань чөдөрлөх болно.
"This is it" киног үзээд сэтгэл хөдлөв. "Ах"-ыг таалал төгсөхөд ийн бичиж байлаа.
Майкл Жексон. Бидний аав ээжийн үед түүний дууг сонсдоггүй хүн “хүн” биш гэх нь холгүй байсан тухай дурсдаг. Харин одоо Майклыг мэдэхгүй хүнийг бас л “хүн” биш гэх дөхдөг. Тавин нэгэн жилийн өмнө эгэл ажилчин Катерина болон Жозеф Уолтер Жексоны гэр бүлд бяцхан хүү мэндэлж дуу хадаасан нь хожим дэлхий нийтийн чих тавин сонсох гайхамшигт хоолой байсан юм.
Аавынхаа хатуу чанга гар дор өссөн Майкл багаасаа л урлагт дуртай байжээ. Сургууль дээрээ төдийгүй найз нөхдийнхөө дунд үргэлж дуулж, бүжиглэн “Зул сарын баяр”-ын тоглолтод оролцдог байв. Харин 1964 онд ах Жеки, Тито, Мэрлон, Жермейн нарын хамт “Жексоны ахан дүүс” хамтлагаа байгуулснаар 11 настайдаа урлагийн ертөнцөд жинхэнэ ёсоор хөл тавьсан юм. Эхэн үедээ Майкл хамтлагт зөвхөн хөгжим тоглох төдий л үүрэгтэй байв. Гэвч удалгүй Жермейнтэй хамт хамтлагийн гоцлол дуучин болж хамтлагийн нэр ч “Жексон-5” болжээ.
1966 онд ахан дүүс “Motown” нэртэй орон нутгийн уралдаанд оролцов. Хөгжмийн R&B, Soul урсгалын эцэг гэгддэг алдарт дуучин Жеймс Брауны “I Got You” дууг Майкл гоцлон дуулснаар тэд уралдаанд тэргүүлэв. Цаашлаад “Motown” дуу бичлэгийн студитэй хамтран ажиллах болж “I want you back”, “ABC”, “The Love You Save”, “I’ll Be There” зэрэг хит дуугаа гарган Их Британийн “Billboard” жагсаалтад дээд амжилтуудыг тогтоох болжээ. Мөн “Rolling Stones” сэтгүүл түүний тухай нийтлэх болж “Майкл хэдий бяцхан хүүхдийн гонгиносон хоолойтой ч, тайзан дээр алдарт Стиви Уэндор, Рей Чарльз, Жеймс Браунаас дутахааргүй биеэ авч явдаг” хэмээн дүгнэсэн байдаг.
Майкл ганцаарчилсан уран бүтээлээ 1972 оноос туурвиж эхэлжээ. Хамтлагийнхаа бүх дууны үгийг бичдэг байсан түүний “Beat it”, “Billie Jean”, “Scream” дуу MTV хөгжмийн сувгаар цацагдаж африк-америк гаралтай өнгөт арьст залуу дэлхий нийтийг шуугиулах болов. Түүнчлэн дууныхаа клипний бүжгийг өөрөө дэглэж робот болон алдарт “сарны алхаа” нэртэй хөдөлгөөнийг нь залуус дуурайн бүжих болжээ. Тэрбээр 1983 оны гуравдугаар сарын 25-нд “Motown 25: Yesterday, Today, Forever” нэртэй тоглолтонд “Billie Jean” дуугаа дуулж, алдарт бүжгийн хөдөлгөөнөө хийснийг 47 сая хүн үзэв.
Тэр цагаас хойш хөгжим судлаачид Майклыг Элвис Пресли болон Ливерпулын дөрвөл “Битлз”-тэй харьцуулах болсон юм. Үүнээс зургаан жилийн дараа АНУ-ын шилдэг уран бүтээлчийг шалгаруулах ёслолын үеэр нэрт жүжигчин Элизабет Тейлор түүнийг “Попын хаан” хэмээн зарласан нь Майклын хамгаас эрхэм алдар билээ.
Тэрбээр уран бүтээлээ туурвихын зэрэгцээ буяны ажилд ихэд оролцдог байв. 1984 онд түүний эл үйлийг тухайн үеийн АНУ-ын Ерөнхийлөгч Рональд Рейган ихэд үнэлэн Цагаан ордонд урьж шагнал гардуулсан удаатай. Түүнчлэн энэ зууны эхэнд Майкл Жексоныг “Хамгийн их буяны ажил хийсэн алдартан”-аар “Гиннес”-ийн номонд мөнхөлжээ. Хүн төрөлхтний түүхэн дэх дээд амжилтыг бүртгэдэг эл номонд Майкл “Бүх цаг үеийн хамгийн алдартай эрэгтэй дуучин” гэдгээрээ ч багтсан. Мөн 35 дахь “Грэмми”-ийн шагнал гардуулах ёсолоос “Амьд домог” шагналыг “өвөрлөсөн” юм.
Майкл 1993 онд “Опра Уинфригийн телевизийн нэвтрүүлэгт оролцож бага насныхаа тухай дэлгэрэнгүй ярьсан байдаг. Эцгийнхээ чанга хатуу дэглэмд өссөн тэрбээр “Аав бүсээ барьж сандал дээр суугаад л хүүхдүүдээ хардаг байлаа. Биднийг аливаа зүйлийг зөв хийхгүй л бол уйлуулна гэдэг байсан” хэмээжээ. Түүний энэ ярилцлагыг Америк даяар 90 сая гаруй хүн үзсэн бөгөөд телевизийн түүхэнд хамгийн олон хүн үзсэн спортын бус нэвтрүүлэгт тооцогддог.
Харин Майкл хувийн амьдралынхаа талаар тэр бүр ярьдаггүй байжээ. Гэвч “Рок-н-роллын алдрын танхим”-д хоёронтоо нэрээ сийлсэн түүний амьдрал олны нүднээс далд байна гэж үгүй. Тэрбээр алдарт Элвис Преслийн охин Лиза Мэри Преслитэй 1995 онд хуримлажээ. Олон жилийн турш бие биенээ мэддэг байсан ч хоёр жилийн өмнөөс л утсаар харилцах болсон тэд гэрлэх шийдвэрээ ч харилцуурын цаанаас гаргаж байв.
Лиза “Майкл над руу утасдаад хэрвээ би чамайг надтай гэрлээч гэвэл чи зөвшөөрөх үү гэж асуусан” хэмээн дурссан байдаг. Гэвч тэдний гэрлэлт хоёр жилийн л настай байв. Удалгүй “History” хос цомгоороо сонсогчдыг байлдан дагуулж байсан тэрбээр сувилагч бүсгүй Дебора Жеан Роутай гэрлэжээ. Тэд Майкл Жозеф, Парис Майкл Катерина Жексон нэртэй хүү, охинтой болсон ч мөн л богино хугацааны дараа хоёр тийш болов. Гэхдээ Майкл гэрлэж байсан бүсгүйчүүлтэйгээ дотно найз хэвээр үлддэг байжээ.
“Попын хаан” Майкл Жексон 21 настайдаа бүжгийн бэлтгэл хийхдээ санамсаргүй хамраа хугалснаас хойш дөрвөн удаа биедээ мэс хүргэсэн. Үүнээс төрөлхийн хар арьсаа цагаан өнгөтэй болгосон нь хэн бүхний анхаарлыг татаж байв. Түүнийг нэгэн жарныг элээж чадаагүйд нь тэрхүү олон удаагийн хагалгаа нөлөөлсөн байх гэж судлаачид дүгнэж буй. Юутай ч ирэх сараас Англид тоглолтоо хийхээр шаргуу бэлдэж байсан тэрбээр зуурдаар нас барж олон хүний сэтгэлд гуниг төрүүлэв. Түүний ах Жермейн пүрэв гаригийн шөнө Лос Анжелес хотноо орон нутгийн цагаар хоёр цаг 26 минутад “Майкл Жексон таалал төгслөө” гэсэн мэдэгдлийг хийсэн юм.
Төд удалгүй Майклын мянга мянган шүтэн бишрэгчид эмнэлэг, гудамж талбайд цуглан эмгэнэн гашуудаж эхэлжээ. Долоо настай бяцхан жаал гэрийнх нь үүдэнд цэцэг өргөж буй болон далан настай өвөө хөргийг нь барин алхаж яваа зургийг интернэт хуудсуудад байрлуулжээ. Мөн түүний байгуулсан “Neverland Ranch” хүрээлэнгийн орчимд ч хөл хөдөлгөөн ихтэй буй. Хэзээд хүүхдээрээ байдаг үлгэрийн баатар Питер Пэний диваажинг байгуулсан тэрбээр “Би сэтгэлдээ өөрийгөө Питер Пэн гэж төсөөлдөг” хэмээсэн удаатай. Харин одоо тэрбээр тэрхүү үлгэрийн ертөнцдөө тайван амгалан нойрсох буй за.
“Би зургаан настайгаасаа хойш урлагийн ертөнцөд өөрийн чадлаар хүчин зүтгэж явна. Харин хүмүүс надад санаатайгаар муу зүйл хийж, зүрхийг минь шархлуулах гэдэг. Гэвч миний ертөнцөд надад хайртай гэр бүл минь, хэзээд намайг дэмждэг шүтэн бишрэгчид минь бий” -Майкл Жексон /”USA Today” сонин, 2007 он/
Салхи хөлөглөн тунарах “элсэн хотын” байдлыг нүдээр үзэхээр Сэтгүүл зүйн ангийн 10 гаруй оюутнууд бид үзэг, цаасаар “зэвсэглэн”, камераа үүрээд баасан гаригийн галт тэргэнд суусан юм. Зам зуур очоод хийх ажлаа төлөвлөн, элдэвийг хөөрөлдсөөр дараа өдөр нь Замын-Үүд суманд хүрэв. Амралтын өдөр сумын байдал эл, хуль байх аж. Төв гудамжаар ганц, нэг хүн холхин үдийн амгаланд хот налайж байлаа. Иймд бид энд хийх ажлаа хойшлуулж, Эрээн хотыг зорихоор боллоо. Замын-Үүдийн боомт руу очиход зовох юм алга. Бидний ярьж заншсанаар 69 машин өнгө өнгөөр жагсаж, том оврын автобус зорчигчоо хүлээн ярайна. Жолооч нар тал талаас чангаан, эгээ л чирээд, бүр болохгүй бол өргөж аваачаад суулгах нь холгүй. Тэдний “довтолгоон” дунд төөрөлдсөөр өндөр, бор жолоочийг даган 69-д нь суулаа. Хязгаар нь үгүй элсэн талыг гайхан нүдээ хэд эргэлдүүлэх зуур боомтод очив. Хилийн шалган нэвтрүүлэх газар гэхэд хэтэрхий энгийн, магадгүй хоцрогдсон тэр байшинд ёстой л бум бужигнаж, түм түжигнэнэ. Эгээ л сүмогийн дэвжээ адил хэзээний наймаа хийж дадсан эгч нар ёкозүна зангаар бөөрөлхөн, шинэхэн маэгашира оюутнууддаа аялж сурсан багш маань озэки цолтон мэт байв.
Ийнхүү нааш цааш түлхэлдсээр хил давж, “аварга гүрвэл”-ийн нутаг Эрээн хотод хүрлээ. Хагас зууны түүхтэй, зүүн хойноо орших Эрээн нуураар овоглосон энэ хотын хаанаас ч үлэг гүрвэлийн дүрст хөшөө, дурсгалыг харж болно. Төв талбайгаа ч тийн тохижуулсан нь учиртай. Олон улсын амьд бодисын номд хамгийн анх тэмдэглэгдсэн чулуужсан аварга гүрвэлийг эндээс олж нээсэн аж.
Хотын өргөн гудамжийг орчин үеийн загвар, шийдэлтэй өнгөлөг байшингаар эмжжээ. Энэ нь нүүр талхлах өнгөн үзмэр бөгөөд тэдний араар олон оны тоосонд элэгдсэн намхан тагз эрийнэ. Ойр хавиас нь урд зүгийн хоолны эвгүй үнэр ханхийж, хамар цоргих нь жихүүцэм. Түүнчлэн эндээс холдолгүй сүүлийн үеийн загварын “төмөр хүлэг” замаар хурдалж, зогсоолд байх нь үзэгдэнэ. Харин дөхөж очоод үзвэл, бүхнийг дуурайгч хөршүүд маань автомашиныг ч алсаас ялгах аргагүйгээр хийчихэж. Мөд ижий, аавыг минь дуурайлгаад хийх вий.
Эрээний хүүхнүүдэд мода хуучирдаггүй бололтой. Өнгөрсөн жил аялалд явсан ангийнхан таван эмэгтэй тутмын дөрөв нь үсэндээ буржгар химитэй гэлцэж байв. Энэ жил биднийг очиход ч тэр байдал хэвээр, харин ч бүр шинэлэг болж уу гэлтэй буржгар үсээ бүгд шар өнгөөр буджээ. Харин гудамжинд тоглох жаалууд нь шинэ хэлбэрийн скит “хөлөглөн” наадна. Арай балчир нь нэг гартаа угжаа, нөгөө гартаа живхээ барин алхаж байхыг ч харав. Багаасаа бие даана гэдэг л тэр байх.
Нэг өдрийг өнгөрүүлэхэд хотын дотор зүг, чигээ олохтой болж, ерөнхийд нь хаана, юу байгааг мэдэв. Цаасан шувуу тэнгэрт дүүлэх зүгт харвал хотын төв талбай үзэгдэнэ. Хавар болохоор өнгө муутай ч, бут, сөөг олныг тарьсан нь зуны дэлгэр цагт ногоороод гэгээ нэмэх байхдаа гэсэн төсөөлөл буув. Ер нь хотын өргөн гудмын хажуугаар мод, цэцэг тарьж цэцэрлэгжүүлэлт хийсэн нь харагдаж байлаа.
Харин нойтон цасаар үдүүлж, чийгийн үнэрт бороо орсон мэт баярлан Эрээнийг орхиж Замын-Үүдэд иртэл байдал эрс өөр. Галт тэрэгнээс буумагц элсэн ингэсэг нүүрэндээ тавиулж, салхины “хээ” төөрөлдөн, зөрөөд задгайлсан үс дороо сэгсийчихэв. Газар зүй, уур амьсгалын нэг бүсэд хаяа дэрлэн аж төрөх хоёр хотын байдлыг харьцуулах арга ч үгүй. Чухам л энэ байдлыг үзэж, ундных нь усны элсийг мэдэрч, орчных нь байдалтай танилцах бидний зорилго.
Замын-Үүд гэж чулуун хөшөөн дээр бахдалтайгаар сийлэн, хаягласан цэцэрлэгт сургуулийн багачуул тоглож харагдана. Байсхийгээд салхи шууран, шороо босох ч тэд үл ажран наадна. Очоод асуувал Замын-Үүд сумын II сургуулийн сурагчид гэв. Тэд анги, хамт олноороо жил бүр сумандаа мод тарьдаг ч, арчилгаа дутсанаас тэр үү олигтой ургадаггүй аж.
Эндэхийн төв зам дээр машин давхихаас илүүтэй салхи хөлөглөсөн элс л “хурдална”. Хааяа нэг үзэгдэх машинуудын дунд баллонтой ус ачсан тэрэг цөөнгүй байв. Замын-Үүдийн усыг унданд хэрэглэхэд шаардлага хангадаггүй тул иргэд цэвэршүүлсэн ус байнга хэрэглэдэг гэнэ. Ус цэвэршүүлэх үйлдвэр нь хувийн компаниуд бөгөөд бидний албан тасалгаанд хэрэглэдэг 19 литрийн баллонтой усыг бараг л айл бүр өдөрт нэгийг авдаг аж. Уг нь Замын-Үүдэд ус цэвэршүүлэх үйлдвэр барихаар олон жил ярьж буй. Төсөл, хөтөлбөрийн талаар ч сонсогдох нь их ч, тэр бүгд нь цаасан дээр “хэрэгжээд”, албан өрөөнд үр дүнг нь “тооцоод” дуусдаг тухай иргэд хэлж байсан юм. Ер нь энэ ажлыг түргэвчлэхгүй бол шаардлага хангахгүй ус хэрэглэсээр Замын-Үүдийнхэн бүг д элэг, цөсний өвчтэй боллоо гэсэн тэдний саналыг ч бид хальсандаа буулгаж авсан.
Энэ мэтчилэн бид иргэдтэй уулзаж, үйлдвэрийн газруудаар орсоор оройн галт тэрэг хөдлөх болоход гэрээс гарах бүртээ ундууцан алхдаг Улаанбаатарынхаа гудамжийг эрхгүй үгүйлж байв.
Галт тэргэнд суумагц нааш, цааш болоход нь бүүвэйлэгдэн, гурав хоногийн аялалдаа алжаавуу гэлтэй нэг мэдэхэд “давсанд явсан” байлаа. Өглөөний нар нүүрэнд тусч, нүдээ нээмэгц гялбахад аяллын сониноо бид ам уралдан ярилцаж олонд хэрхэн хүргэх тухайгаа бодсоор гэрийн зүг явцгаалаа.
Хэдийгээр чанарын шаардлагыг төгс хангаагүй ч, “Элсэн хот”-оос “аварга гүрвэл”-ийн нутагт хүрэх зуурт авсан дүрс, олсон мэдээллээрээ бид бяцхан сурвалжлага бэлтгэж “C1” телевизийн “Экологийн элч” нэвтрүүлэгт хүргүүлсэн юм. Төд удалгүй, аяны сониноо нөхөддөө ярихаас урьтан эл нэвтрүүлэг эфирт цацагдсанд, явсны үр дүн гарлаа гээд бид ихэд урамшсан. Цаашид ч сургуулийн зүгээс шаардлагатай тоног төхөөрөмжөөр ханган, оюутнууд хийх ажлаа сайтар төлөвлөөд явахад “супер” нэвтрүүлэг биш юмаа гэхэд танилын нүүр харсан биднээс хавьгүй илүү чанартай, чансаатай бүтээл төрөх байх гэсэн бодол төрснийг нуух юун.