Эмэгтэйчүүдийн баяр дөхжээ. Уур амьсгал хэдийнэ ороод, зарим хүмүүс бүр тэмдэглээд эхэлчихэж. Харин баасан гаригийн үдэш, энэ баярыг угтаж зохиолч, сэтгүүлч Б.Шүүдэрцэцэгийн "Миний ертөнц" нийтлэлийн, "Хайр" сонсдог хос номын нээлт боллоо. "Хайр" цомогт "Сүүлчийн өртөө", "Цасан нулимс" зэрэг зохиолчийн өгүүллэгүүдийг жүжигчин Т.Алтантуяа уншжээ. Түүнийг үзэгчид "Тусгай салаа" олон ангит киноны Сүлдийн ээжийн дүрээр таних билээ. Харин "Миний ертөнц" номд Б.Шүүдэрцэцэг зохиолчийн өөрийн амьдралын дуртгалууд болон "Эмч нар Мария үзэж байв уу?", "Сүүдэр дайрсан бага нас" гээд сэтгүүлзүйн нийтлэлүүд багтжээ.


  Нээлтийн ажиллагааны үеэр зөвхөн номоо таниулаад өнгөрөх биш, зохиолч төдийгүй ирсэн зочид эмэгтэйчүүдийн эрхийг хамгаалах, тэгш эрхийн талаар үзэл, бодлоо илэрхийлж байсан юм. Б.Шүүдэрцэцэг "Эмэгтэйчүүдийн баяр гэдэг бид эрчүүдээс бэлэг горьдох өдөр биш. Өөрсдийн эрхийн төлөө тэмцэх өдөр юм шүү" гэдгийг онцолж байв.


Мөн хатагтай Ц.Оюунгэрэлийн хувьд "Хотол цагаан" гэх жүжгийн зохиол бичсэнээ дуулгалаа. Энэ түүхэн хатан гоо үзэсгэлэн төгс бөгөөд улсыг удирдаж явсан эмэгтэй билээ. Түүнчлэн эрийн гурван наадамд "зодоглож" байсан бөгөөд түүнээс хойш монгол бөхийн зодог шуудаг өнөөгийн хэлбэрийг олсон гэдэг. Жүжигт түүний удирдлагын явцад учирч буй улс, төрийн бэрхшээлийн талаар, түүнийг хэрхэн шийдвэрлэж байгааг харуулжээ. Тайзанд тавих хэмжээнд арай хүрээгүй байгаа ч, "Монфемнэт" байгууллагатай хамтран радио жүжиг болгож, тун удахгүй олны хүртээл болгох гэнэ.